កំពត៖ រដ្ឋបាលខេត្តកំពត នឹងរៀបចំការប្រណាំងទូក នៅព្រែកកំពង់បាយ (បរិវេណខាងមុខសាលាខេត្ត) នៅថ្ងៃទី១០-១១ ខែវិច្ឆិកា ឆ្នាំ២០២៣ ខាងមុខនេះ នៅដើម្បីចូលរួមអបអរសាទរព្រះរាជពិធីបុណ្យ អុំទូក អកអំបុក សំពះព្រះខែ និងបណ្តែតប្រទីប។

ក្រៅពីពលរដ្ឋអាចទស្សនាការប្រណាំងទូក ពលរដ្ឋក៏អាចរីករាយជាមួយនឹងការប្រគុំតន្ត្រី បាញ់កាំជ្រួច និងការតាំងពិពរណ៌ភូមិមួយផលិតផលមួយផងដែរក្នុងរយៈពេល ២ថ្ងៃនោះ។

រដ្ឋបាលខេត្តបានអំពាវនាវឱ្យសាធារណជន ភ្ញៀវជាតិ អន្តរជាតិ និងប្រជាពលរដ្ឋ អញ្ជើញចូលរួមកម្សាន្តសប្បាយឲ្យបានច្រើនកុះករ និងចូលរួមថែរក្សាអនាម័យបរិស្ថានទាំងអស់គ្នាផងដែរ។

បុណ្យអុំទូកនៅឆ្នាំនេះនៅតាមបណ្តាខេត្តមួយចំនួន ដូចជាខេត្តបាត់ដំបង កំពង់ធំ ព្រៃវែង កណ្តាល និងខេត្តកំពង់ចាម បានរៀបចំពិធីប្រណាំងទូករួចរាល់កាលពីថ្ងៃចុងសប្តាហ៍កន្លងទៅនេះ។ ខេត្តដ៏ទៃៗទៀត ក៏នឹងចាប់ផ្តើមរៀបចំពិធីប្រណាំងទូកផងដែរនៅអំឡុងខែវិច្ឆិកាខាងមុខនេះផងដែរមុននឹងរាជធានីភ្នំពេញប្រារព្ធពិធីប្រណាំងទូកបែបលក្ខណៈអធិកអធមដោយមានការចូលរួមពីកីឡករអុំទូកមកពីគ្រប់បណ្តាខេត្ត៕